Category: Velferðir

Hið gullna svæði Ítalíu

Fararsnið hefur á undanförnum árum boðið upp á Sælkeragöngur í Toskana á Ítaliu. Í þessum ferðum njótum við einstakrar náttúrufegurðar, léttrar hreyfingar, matar- og vínmenningar í héraðinu sem gjarnan er nefnt hið gullna svæði Ítalíu. Byggingarlistin  og myndlistin á sér enga hliðstæðu enda má segja að fæðingarstaður endurreisnarinnar sé í Toskana héraði. 

Við höfum ákveðið að bjóða tvær ferðir til Toskana á næsta ári, í lok maí / byrjun júní og í ágúst. Báðar ferðirnar seldust upp í fyrra. Við ferðumst í litlum hópum og einbeitum okkur að því að njóta þeirra listisemda sem þetta sögufræga hérað hefur að bjóða.

Gist á glæsilegu hóteli

Gist verður í bænum Montecatini Terme á Grand Hótel Vittoria sem er glæsilegt hótel í Liberty stíl. Hótelið stendur ofarlega í bænum en er þó í þægilegu göngufæri frá miðbænum. Veitingahús eru fjölmörg og bjóða uppá  úrval kræsinga. Við hótelið er sundlaug og fallegur garður þar sem hægt er að njóta hvíldar. Hótelið býður líka upp á heilsumeðferðir þar sem fá má allskyns dekur sé þess óskað.

Gangan í bæinn tekur um 7 mínútur og gaman að ganga niður breiðgötuna sem liggur frá hótelinu og var á gullaldarárum Montecatini Terme glæsileg heimreið að þessu fína hóteli.

Menningarferðir til Lucca, San Gimignano og Vinci

Ferðin til Lucca er fyrsti viðkomustaður okkar en Lucca var valdamikið borg-ríki og ein af mikilvægustu borgum Ítalíu á miðöldum. Hringlaga  borgarmúr umlykur þessa fallegu borg sem á sér merka sögu og var Leonardo da Vinci einn af nokkrum sem komu að hönnun múrsins. Við fáum innsýn inn í sögu og menningu borgarinnar með innlendri staðarleiðsögn sem enginn verður svikinn af. Puccini var fæddur og alinn upp í Lucca og var hann alla tíð mjög stoltur af heimahögunum. Eftir góða fræðslu fáum við rúman tíma til að kíkja í verslanir, fá okkur hressingu í iðandi mannlífinu, ganga um, njóta eða leigja hjól og hjóla uppi á borgarmúrnum sem er bæði aðgengileg og skemmtileg upplifun.

Næsti bær sem við heimsækjum er Vinci en þar förum við í gönguferð um æskuslóðir Leonardo da Vinci. Þann dag munum við ganga um hæðir og vínekrur, landslag sem veitti meistara Vinci mikinn innblástur. Við munum heimsækja vínbónda á leið okkar, smakka á framleiðslunni og fá hádegishressingu.
Þegar maginn er mettur höldum við áfram til Vinci þar sem okkur gefst kostur á að skoða safn sem heldur utanum helstu vísindaafrek meistara Vinci.
Óhætt er að segja að heimsókn á heimaslóðir þessa einstaka listamanns og það að kynnast betur uppruna hans og æviskeiði sé nærandi fyrir andann.

Að lokum förum við til San Gimignano og er sá dagur að margra mati hápunktur ferðarinnar. Bæjarstæði þessa ævintýralega miðaldabæjar sem í dag er oft nefndur „fimm turna bærinn“ er einstakt. Á miðöldum kepptust menn við að reisa hæsta turninn í bænum sem stöðutákn og þegar hæst stóð voru þeir orðnir ríflega 70 talsins. Það er því óhætt að líkja San Gimignano á miðöldum við skýjakljúfa New York borgar – á örlítið smærri skala.
Þegar við höfum skoðað okkur um í bænum tekur Fenzi fjölskyldan á móti okkur á vínbúgarðinum sem þau hafa rekið frá 1932. Við kynnumst framleiðslunni og fáum léttan hádegisverð þar sem afurðir beint frá býli verða bornar á borð.

Næði til að njóta á frídegi

Í ferðum Fararsniðs er jafnan reynt að tryggja frjálsan tíma til að njóta staðar og stundar að vild.

Hægt er að að fara til Viareggio skoða þennan fallega strandbæ hvort heldur sem er til að hvíla sig á ströndinni eða njóta byggingalistar og mannlífsins. Einfalt er að snúa aftur til Lucca, heimsækja Flórens eða Pistoia, ganga um Montecatini Terme og skoða þennan sögufræga heilsubæ sem á sínum tíma var mjög mikilvægur áningastaður betri borgara en þeir flykktust þangað til að bæta heilsuna í félagsskap annarra mektarmanna, sýna sig og sjá aðra.

Í bænum er einnig fjöldi matsölustaða sem gaman er að heimsækja.

Matur og menning

Ítalía öll er mikil matarkista og þykir okkur hjá Fararsniði gaman að bjóða upp á góðan mat og vín í ferðum okkar. Áhersla er lögð á svæðisbundna rétti í takt við „slow food“ stefnuna þar sem hráefnið er árstíðabundið og sótt í heimahagana. Við heimsækjum vínbændur og ólífusamlag þar sem við fáum innsýn inn í ræktunina og þær áskoranir sem henni fylgja.

Flestar máltíðir sem innifaldar eru í dagskránni eru margrétta máltíðir með víni og er hver og einn staður valinn með tilliti til einstakrar upplifunar fyrir bragðlauka og önnur skilningavit.

Til þess að næra sálina förum við m.a. í göngur í fögru umhverfi, skoðum áhugaverðar byggingar (3-7 km) og njótum létt-klassískra tónleika á einstökum stað sem er á heimsminjaskrá Unesco.

Tími til að bóka

Nánari ferðadagskrá er að finna hér:
Sælkeraganga í Toskana 28. maí – 4. júní 2026
Sælkeraganga í Toskana 24.-31. ágúst 2026

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


„Suður um höfin að sólgylltri strönd.. 🎶

…svífur minn hugur, þegar kólna fer um heimalönd“ segir í laginu og því fer ekki fjarri að hugurinn reiki á hlýrri slóðir á köldum vetrardögum. 
Króatía er einstök nátturuperla við Adriahafið en henni tilheyra yfir þúsund eyjar og eru 48 þeirra í byggð. Í vinsælu Hjólaferðunum okkar siglum við á snekkju með rafmagnsreiðhjól í farteskinu milli nokkurra þessarra eyja, gistum um borð og hjólum á eyjunum.

Gistingin fylgir okkur

Það má segja að þetta sé hinn fullkomni ferðamáti þegar króatísku eyjarnar eru sóttar heim. Það er einstök upplifun að ferðast með þessum hætti því „hótelið“ fylgir okkur alla leið og því gefst meiri tími til að njóta dvalarinnar á eyjunum.
Allar káetur eru með sér baðherbergi, loftkælingu og öryggishólfi. Góð aðstaða er á dekki til að slaka á, njóta umhverfisins og eiga skemmtilegar stundir með ferðafélögunum.

Hjóladagar – eyjahopp

Siglingaleiðin er áþekk í öllum ferðum, í sumum er þó siglt til og frá Trogir en í öðrum milli Trogir og Dubrovnik eða öfugt.
Af þeim eyjum sem við heimsækjum er helst að nefna eyjuna Vis ( sem er einn af tökustöðum Abba myndarinnar Mamma Mía), Hvar, Brač og Korčula.

Við byrjum alla hjóladaga klukkan 9 eftir góðan morgunverð um borð og njótum þess að hjóla mis-langar dagleiðir í fallegu og fjölbreyttu umhverfi. Ferðirnar eru allt frá 20 – 55 km þar sem við hjólum á nýjum rafmagnshjólum og geta allir sem kunna að hjóla komið með. Í þessum ferðum er orðatiltækið „að njóta en ekki þjóta“ í hávegum haft. Við gefum okkur góðan tíma í hjólaferðunum til að njóta náttúrunnar, taka myndir eða stinga okkur í sjóinn.
Ef einhverjir kjósa að slaka á einn og einn dag er hægt að verða eftir um borð og sigla á snekkjunni eða skoða sig um á eyjunum eftir atvikum. Einnig fylgir trússbíll hópnum á flestum dagleiðum og hægt að fá far sé vilji til þess.

Matur um borð

Morgunverðarhlaðborð með öllu því helsta, opnar í matsalnum klukkan 7:30 alla daga en árrisulum býðst kaffi/te frá klukkan 7. Hálft fæði er innifalið um borð, 3ja rétta hádegis- eða kvöldverður eftir því sem fellur betur að ferðadagskrá. Að auki býður skipstjórinn til hátíðarkvöldverðar þar sem siður er að klæðast hvítum fatnaði.

Kvöldlíf á eyjunum

Eyjarnar sem við heimsækjum hafa hver sinn sjarma með fjölbreytt framboð veitingahúsa og skemmtilegu kvöldlífi. Dásamlegt er að rölta um, kíkja í búðir,  njóta mannlífs og matarmenningar í þessu einstaka umhverfi.

Tími til að bóka

Sala hefur gengið vel og káetum farið að fækka.

Nánari ferðadagskrá er að finna hér:
Hjól og sigling í Króatíu 9.- 16.maí
Hjól og sigling í Króatíu 20.- 27. júní – 3 káetur lausar
Hjól og sigling í Króatíu 8. – 15. ágúst
Hjól og sigling í Króatíu 15. – 22. ágúst– Norðureyjar

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


Risottó með ferskum andblæ

Nú styttist í jólin með tilheyrandi veislum og velgjörðum. Þess vegna ákváðum við Fararsniðsstöllur að bregðast við áskorunum frá ferðafélögum okkar á Ítalíu og birta hér eina uppskrift sem kom verulega á óvart og sló í gegn í vínuppskeruferðunum okkar í haust. 

Svepparisottó þarf vart að kynna enda vinsæll réttur langt út fyrir Ítalíu. Í haust fengum við kóngasveppa-risottó með nýju „twisti“ eða með skógarberjum sem léku eins og ferskur andvari um „grjónagrautinn“ eins og einhver komst að orði.

Á haustin gerist allt…….

Það er svo skemmtilegt að ferðast um Ítalíu að hausti þegar vínuppskeran er á fullu, skógarnir fullir af sveppum eftir haustskúrina, villtum skógarberjum og kastaníuhnetur liggja á víð og dreif. Þetta er sannarlega mikill gleði tími. 

Ilmurinn af kóngasveppa-risottói er dásamlegur og ber skóginum vitni og rétturinn bragðast jafnvel enn betur með rosé freyðivíni. Þetta er einfaldur réttur sem þarf örlitla viðveru við pottana sem getur líka verið kærkomin núvitund í amstri dagsins. 

Buon appetito!

Risotto ai funghi porcini e frutti di bosco Kóngasveppa risottó með skógarberjum 

Réttur fyrir 4 

Hráefni
300 g risottó hrísgrjón s.s Arborio sem fæst víða t.d í Krónunni og Hagkaup
50 g þurrkaðir kóngasveppir
3 msk rifinn parmaostur
1/2 laukur smátt skorinn
1 l heitt sveppasoð
2 msk jómfrúarolía
1 msk smjör
1 væn lúka af skógarberjum að vild t.d brjómber, hindber, bláber, rifsber ( berin mega gjarnan vera þurrkuð, við notuðum frostþurrkuð ber sem fást t.d í Seiðkarlinum í Faxafeni og er þeim bætt út í alveg í lokin en fersk ber eru sett út í eftir á) 


Aðferð: 
1. Hellið heitu vatni yfir sveppina og látið standa í 20-30 mín.
2. Sveppasoð hitað upp í potti og því haldið heitu
3. Steikið laukinn létt í olíunni í potti
4. Kreistið vökvann úr sveppunum ( geymið vökvann) og bætið út í pottinn og steikið áfram
5. Bætið hrísgrjónunum út í pottinn og steikið áfram í smá stund
6. Hellið einni ausu af sveppasoði út á grjónin og hrærið þar til vökvinn er nánast horfinn. Endurtakið leikinn í ca 18 mínútur eða þar til grjónin eru alveg að verða soðin (þetta er risottó og það á að vera „al dente“ eða „undir tönn“ þ.e við finnum fyrir þéttum kjarnanum í grjónunum).
7. Ef við notuð þurrkuð ber þá fara þau úti uþb. einni mínútu áður en við tökum pottinn af hellunni. Hinsvegar er best að setja fersk yfir risottóið þegar það er komið á diskana og hver og einn hrærir þeim þá saman við.
8. Þegar rétturinn er tilbúinn hrærum við parmaosti og smjörklípu samanvið áður en við skömmtum á diska.

Berið fram með góðu brauði og rosé freyðivíni 🥂

Hægt er að lesa um vínuppskeruferðirnar hér

Uppskerugleði

Fararsnið hefur á undanförnum árum boðið upp á Vínuppskeruferðir til norður Ítalíu, ferðir sem hafa verið vinsælar bæði fyrir einstaklinga og vinahópa- enda fátt skemmtilegra en að læra, njóta og upplifa í góðum félagsskap. Norður Ítalía, frjósamasta svæði og stærsta matarkista landsins er spennandi áfangastaður á haustin. 

Þar sem færri komust að en vildu í Vínuppskeruferðina 22.september ákváðum við að setja aðra ferð í sölu 29.september – 6.október.

Gist í sveit og borg

Við upplifum andstæður í sveit og borg – friðsæld í skjóli Alpanna og iðandi mannlíf stórborgar. Gist verður í 4 nætur á herragarði rétt norðan við Verona þar sem ekkert herbergi er öðru líkt og veitingastaðurinn laðar til sín gesti víða að enda ratar hann árlega í Michelin vísinn.

Úr sveitum Veneto héraðs færum við okkur í vestur, til Torino, fyrstu höfuðborgar Ítalíu með glæsilegar byggingar og torg. Þar gistum við á mjög góðu 4* hóteli á besta stað í borginni, rétt við aðal verslunargötuna. Á efstu hæðinni er að finna „roof-top“ bar með óviðjafnanlegu útsýni til Alpafjalla og helstu kennileita borgarinnar. Fjöldinn allur af góðum veitinga- og kaffihúsum er staðsettur í nágrenninu og einn stærsti matarmarkaður Ítalíu er í göngufæri. 

Vínkjallarar og aðrar skemmtilegar heimsóknir

Í þessari ferð þræðum við vínsvæði frá austri til vestur á norður Ítalíu. Við hefjum leikinn í Veneto héraði sem liggur að Adríahafi í austri. Hér kynnumst við Valpolicella vínum, heimsækjum vínbændur í Soave, kynnumst framleiðsluferlinu, lífrænni ræktun, áskorunum og mikilvægi vísindanna í því ferli. Orðatiltækið að uppskera eins og til var sáð er ekki alveg algilt þegar veðurguðirnir og náttúruöflin taka í taumana.

Ólífuuppskeran er aðeins seinni á ferðinni en vínuppskeran og getur hún Rebecca því gefið sér tíma til að  bjóða okkur í ólífuframleiðslu fjölskyldunnar. Hún segir okkur frá því hvernig ræktun og vinnsla á gæða ólífuolíu fer fram og hvernig allir verða að leggjast á árarnar þegar uppskeran stendur sem hæst. Hún mun einnig kenna okkur að smakka og para olíu við mat- rétt eins og gert er með vín. 

Úr Veneto héraði höldum við í gegnum Langbarðaland (Lombardia hérað) þar sem við ætlum að fræðast um flaggskip ítalskra freyðivína, Franciacorta, sem eru framleidd með tímafrekri kampavínsaðferð. 

Við endum ferðalagið í Piemonte héraði þar sem við gistum í Torino en þaðan heimsækjum við Barolo, sem er sjarmerandi lítill miðaldabær og er hvað þekktastur fyrir framleiðslu Barolo rauðvína sem margir telja þau allra bestu á Ítalíu. Þar lærum við um sögu þessara rómuðu vína, fáum að skoða vínkjallara og endum kvöldið á dýrindis máltíð með pöruðum vínum.

Matarupplifun og léttar göngur

Vínuppskeruferðin er sannkölluð sælkeraferð og er hver sælkeraveislan á fætur annarri borin á borð en margverðlaunaður kokkur á herragarðinum kennir hópnum jafnframt að elda dásamlega rétti úr héraði. Einn góður ferðafélagi komst svona að orði í lok ferðar:

„Til fyrirmyndar, Fararsnið,
á ferð um Ítalíu.
Á einu máli erum við
að allt sé upp á tíu!

Ólívur og eðalvín,
úrvalskjöt og pasta.
Ekki gráta, elskan mín,
það er engin leið að fasta!“

Þessi orð lýsa stemningunni einkar vel. En holl hreyfing er nauðsynleg í bland og njótum við þess að fara í létta göngu um beykiskóg í Lessinia þjóðgarðinum, þræða vínekrur í hlíðum Soave og rölta um Verona borg. Ef einhver er ekki upplagður til göngu er í öllum tilfellum hægt að komast hjá þeim og hitta hópinn að göngu lokinni.

Frídagur í Torínó, París Ítalíu

Frjáls tími gefst í Torino sem jafnframt er oft kölluð París Ítalíu vegna franskra áhrifa og glæsilegra bygginga. Borgin hefur upp á margt að bjóða og þarf engum að leiðast á frídeginum. Gaman er t.d að rölta um borgina, njóta mannlífs, kaffihúsastemningar og markaða, fara í skoðunarferð um borgina með strætó, skoða glæsilegar hallir eða stærsta Egyptalandssafn utan Egyptalands.

Tími til að bóka

Nánari ferðadagskrá er að finna hér:
Vínuppskeruferð til Ítalíu 29.sept – 6.okt

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


Frábær ferðamáti til að upplifa Króatíu

Króatía er einstök nátturuperla við Adriahafið en henni tilheyra yfir þúsund eyjar og eru 48 þeirra í byggð. Í vinsælu Hjólaferðunum okkar siglum við á snekkju með rafmagnsreiðhjól í farteskinu milli nokkurra þessarra eyja, gistum um borð og hjólum á eyjunum.

Gistingin fylgir okkur

Það má segja að þetta sé hinn fullkomni ferðamáti þegar króatísku eyjarnar eru sóttar heim. Það er einstök upplifun að ferðast með þessum hætti því „hótelið“ fylgir okkur alla leið og því gefst meiri tími til að njóta dvalarinnar á eyjunum.
Allar káetur eru með sér baðherbergi, loftkælingu og öryggishólfi. Góð aðstaða er á dekki til að slaka á, njóta umhverfisins og eiga skemmtilegar stundir með ferðafélögunum.

Hjóladagar – eyjahopp

Siglingaleiðin er áþekk í öllum ferðum, í sumum er þó siglt til og frá Split en í öðrum milli Split og Dubrovnik eða öfugt.
Af þeim eyjum sem við heimsækjum er helst að nefna eyjuna Vis ( sem er einn af tökustöðum Abba myndarinnar Mamma Mía), Hvar, Brač og Korčula.

Við byrjum alla hjóladaga klukkan 9 eftir góðan morgunverð um borð og njótum þess að hjóla mis-langar dagleiðir í fallegu og fjölbreyttu umhverfi. Ferðirnar eru allt frá 20 – 55 km þar sem við hjólum á nýjum rafmagnshjólum og geta allir sem kunna að hjóla komið með. Í þessum ferðum er orðatiltækið „að njóta en ekki þjóta“ í hávegum haft. Við gefum okkur góðan tíma í hjólaferðunum til að njóta náttúrunnar, taka myndir eða stinga okkur í sjóinn.
Ef einhverjir kjósa að slaka á einn og einn dag er hægt að verða eftir um borð og sigla á snekkjunni eða skoða sig um á eyjunum eftir atvikum.

Matur um borð

Morgunverðarhlaðborð með öllu því helsta, opnar í matsalnum klukkan 7:30 alla daga en árrisulum býðst kaffi/te frá klukkan 7. Hálft fæði er innifalið um borð, 3ja rétta hádegis- eða kvöldverður eftir því sem fellur betur að ferðadagskrá. Að auki býður skipstjórinn til hátíðarkvöldverðar þar sem siður er að klæðast hvítum fatnaði.

Kvöldlíf á eyjunum

Eyjarnar sem við heimsækjum hafa hver sinn sjarma með fjölbreytt framboð veitingahúsa og skemmtilegt kvöldlíf. Dásamlegt er að rölta um, kíkja í búðir,  njóta mannlífs og matarmenningar í þessu einstaka umhverfi.

Tími til að bóka

Nú þegar er uppselt í tvær ferðir og káetum farið að fækka í öðrum.

Nánari ferðadagskrá er að finna hér:
Hjól og sigling í Króatíu 16.- 23. ágúst – Aðeins 3 káetur lausar
Hjól og sigling í Króatíu 6.- 13. september
Hjól og sigling í Króatíu 20. – 27. september

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


Föngum töfra Grikklands

Nú endurtökum við leikinn þar sem Sælkeraferðin til Grikklands lukkaðis svo vel í ár og færri komust að en vildu. Næsta ferð verður dagana 6. – 14. október. Ferðin stóðst heldur betur væntingar og hópurinn naut þess að skoða þetta einstaka land þar sem fortíð og nútíð mætast átakalaust og heillandi. Flogið verður beint til Aþenu og við dveljum í 8 nætur á tveimur stöðum, í Nafplio og Aþenu. Þar kynnumst við menningunni undir dyggri leiðsögn Dominik Brun, leiðsögu- og heimamanns og íslensks fararstjóra. Við munum líka njóta alls þess besta sem grísk matargerð hefur uppá að bjóða.

Gist á góðum hótelum

Fyrstu dagana munum við dvelja í bænum Nafplio þar sem við gistum á góðu fjölskyldureknu hóteli. Hótel Letonuevo er mjög vel staðsett í bænum og stutt í allt sem bærinn hefur uppá að bjóða. Í þessum einstaka hafnarbæ sem margir telja einn þann rómantískasta í Grikklandi er ljúft að rölta um og njóta mannlífs og menningar.

Í seinni hluta ferðarinnar dveljum við á Hótel Acropoliselect, mjög góðu og vel staðsettu hóteli  í miðborg Aþenu. Stutt er í alla þjónustu, markað og aðeins er stutt ganga að Acropolishæðinni frá hótelinu. 

Skoðunarferðir

Af fjölmörgum viðkomustöðum okkar í þessari Sælkeraferð má nefna fornminjarnar í Epidauros, Asclepios heilsuböðin, Corinth skipaskurðinn sem er bæði sá dýpsti í heimi og ákaflega tilkomumikill að ógleymdri sjálfri Acropolishæðinni í Aþenu. Við munum eiga rólegan dag á eyjunni Aegina, þar munum við ganga um, fá okkur hádegisverð og njóta lífsins.

Næði til að njóta á frídögum

Í þessari ferð eru tveir frjálsir dagar til að gera það sem hugurinn girnist. Við fáum frídag í Nafplio sem hægt væri að nýta til að rölta um, slaka á í bænum eða fara á ströndina. Tímann má ennfremur nota til að skoða Palamidi kastalann sem stendur í hlíðunum fyrir ofan bæinn og  var reistur af Feneyingum á mettíma um 1713,  en hann gegndi mikilvægu hlutverki í grísku uppreisninni.

Annar frídagur gefst svo í Aþenu í lok ferðar en þar þarf engum að leiðast enda einstaklega lífleg borg.

Að lifa til að borða eða …

Ómissandi í Sælkeraferðum Fararsniðs eru heimsóknir til vínbænda og þessi ferð er engin undantekning frá þeirri reglu. Við fáum leiðsögn um vínakrana, kynnumst framleiðsluferlinu og fáum að smakka afurðirnar. Einnig heimsækjum við ólífubónda og framleiðanda  lífræns balsamikediks og  fáum að gæða okkur á lokaafurðum þeirra. Margir þekkja grísku útgáfuna af „brennivíni” Ouzo og Tsipouro sem svipar til Grappa á Ítalíu en við fáum einnig innsýn í framleiðsluna á því. Þegar til Aþenu er komið fáum við leiðsögn um líflegan matarmarkað þar sem heimamenn versla og ferskmetið fyllir borðin.

Tími til að bóka

Nokkur sæti eru laus í þessa einstöku ferð þar sem við dekrum við öll skilningarvitin.

Nánari ferðadagskrá er að finna hér:
Sælkeraferð til Grikklands 6. – 14. október 2025

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


Tvær bombur í desert

Fyrsti  í aðventu er runninn upp og áfram höldum við að brasa í eldhúsinu eins og við lofuðum. Nú eru það tveir eftirminnilegir og vinsælir eftirréttir úr Vínuppskeruferðunum, Semifreddo og Freyðivínshlaup. 

Sá fyrri útleggst sem Hálfkaldur eða Hálffrosinn á okkar ylhýra en er þekktari undir heitinu Semifreddo og fæst víða á Ítalíu í ýmsum útfærslum. Þessi réttur hentar kannski ekki þeim sem vilja takmarka hitaeininga inntöku en er því betri fyrir vikið –  Er líka ekki alveg óþarfi að telja þær um hátíðarnar? 

Rétturinn er nú kannski ekki al-ítalskur og má finna útfærslur í nágrannalöndunum, Parfeit í Frakklandi og Semifrío á Spáni. Hann dregur nafnið sitt af því að hann frýs ekki alveg í gegn – rétt eins og rjómaísinn hennar mömmu. Verður hann þá velúrkenndur og rennur ljúflega niður.

Semifreddo – „Hálfkaldur” ís
f/6 manns

Innihald: 
½ l. rjómi 
180 gr. sykur 
60 gr. Vatn
100 gr. Eggjahvítur 
200 gr. Hnetukrókant eða daim kurl

Aðferð:

  1. Rjóminn er stífþeyttur. 
  2. Sjóðum saman sykur og vatn til að leysa sykurinn upp og látið standa aðeins. 
  3. Eggjahvíturnar eru stífþeyttar, þá hellum við heitri sykurblöndunni í mjórri bunu samanvið og hrærum áfram í 10-15 mínútur, eða þar til við fáum þétta blöndu. 
  4. Rjómanum og marengs blandað varlega saman ásamt muldu krókanti eða daim kurli. 
  5. Sett í lokað ílát og fryst í amk 5 klst. eða yfir nótt. Gott er að taka ísinn út 10-15 mín áður en hann er borinn fram. 

Seinni rétturinn vekur jafnan mikla aðdáun  – er fallegur, einfaldur og ferskur á bragðið en það er hlaup búið til úr sætu Moscato freyðivíni með ferskum ávöxtum- fullkominn áramótaréttur.  Til að toppa máltíðina er best að gæða sér á samsvarandi vínglasi með. Galdurinn er að halda búbblunum í hlaupinu sem gerir það svo ómótstæðilegt. Þá er gott að eiga góða að og meistarakokkurinn Friðrik V. var ekki lengi að finna einfalda lausn á þeirri áskorun.

Moscato  freyðivínshlaup
f/6 manns

Innihald: 
375 ml. Moscato freyðivín (½ flaska) – má vera annað sætt freyðivín.
5 matarlímsblöð
2 msk sykur
Fersk ber t.d jarðaber, bláber, brómber eða hindber. 

Aðferð: 

  1. Matarlímsblöð lögð í bleyti í köldu vatni þar til þau verða mjúk.
  2. Hitið 1 dl af freyðivíninu upp að suðu, bætið sykrinum út í og leyfið honum að leysast upp. 
  3. Kreistið allt vatn úr matarlíminu, setjið út í pottinn með blöndunni og hrærið rólega þar til límið er uppleyst. 
  4. Hellið blöndunni í skál, bætið restinni af freyðivíninu samanvið og hrærið varlega ( til að eyða ekki búbblunum). 
  5. Berjum komið haganlega fyrir í 6 formum eða skálum og blöndunni hellt yfir. 
  6. Kælið í ísskáp í amk 3 tíma- má vera yfir nótt.

Gott er að bera þetta fram með afganginum af freyðivíninu. 

Blúndukörfur í bónus 

Við bættum einni „bónus” uppskrift við en hún hefur reyndar ekkert með Vínupperskuferðirnar að gera- Blúndukörfur, litlar braðggóðar skálar sem glæsilegt er að bera Semifreddo fram í, nú eða rjómaísinn hennar mömmu fyrir þá íhaldssömu. Þær er auðvelt að útbúa daginn áður og eiga tilbúnar þegar að veislunni kemur.

Blúndukörfur
f/6 manns

Innihald: 
50 gr. smjör
50 gr. síróp
50 gr. sykur 
50 gr. hveiti

Aðferð: 

  1. Bræðið saman smjör, sýróp og sykur þannig að úr verði fljótandi karamella. 
  2. Takið af hitanum og sigtið hveitið út í. 
  3. Hrærið saman svo úr verði deig sem er látið er standa við stofuhita góða stund. 
  4. Skiptið deiginu í 6 jafn stórar kúlur, 
  5. Fletjið 2 kúlur í einu út í hring á ofnplötu og bakið tvær saman við 175 gráðu hita þar til kökurnar eru orðnar „gullnar”. 
  6. Takið plötuna út og leyfið kökunum að kólna smá stund eða þar til hægt er að taka deigið af plötunni með pönnukökuspaða. 
  7. Kökunum er komið fyrir ofan á glösumi eða litlum skálum þannig að þær leggist yfir, verði að körfu og harðni. Þá eru þær fjarlægðar og þeimi snúið við. 
  8. Endurtakið með hinar kúlurnar tvær og tvær í einu.

Þetta er upplagt að útbúa deginum áður. 

Góða skemmtun og buon appetito !

Hreyfigleði – fyrir þig?

Í júní höldum við í  Hreyfigleðiferð til Toskana og Cinque Terre í þriðja sinn. Jómfrúarferðin fyrir 2 árum lukkaðist ákaflega vel þrátt fyrir að veðurguðirnir hefðu skorað á okkur – en íslenski hópurinn sem kom úr fremur slöku sumarveðri á Íslandi lét það ekki á sig fá! Stemningin var frábær og ný upplifun á hverjum degi. 

Hreyfigleði-hugmyndin varð til vegna samblands af óskum ferðafélaga okkar og eigin áhuga á þessu ferðamynstri. Því ekki að hreyfa sig mátulega í fríinu, hafa það huggulegt á eftir í góðri gistingu og gera vel við sig í mat og drykk? Þetta er í grunninn sama hugsun og í vinsælum Sælkeragöngum Fararsniðs en hér er enn meiri áhersla lögð á hreyfinguna.

Er Hreyfigleði fyrir þig?

Þetta er ferð sem hentar þeim sem vilja njóta en ekki þjóta en hafa jafnframt gaman af því að hreyfa sig í fríinu. Þeir sem komast upp að steini í Esjunni án mikilla átaka eiga ekki í vandræðum með hreyfihluta þessarar ferðar. Það þarf enginn að hafa siglt á kanóa eða klætt sig í blautbúning áður – Að reyna það í fyrsta skipti saman er bara hluti  ævintýrisins. Oft er hægt að finna „léttari útgáfu“ af hreyfingunni, gerist þess þörf. 

Gist í sveit og borg 

Fyrstu 4 næturnar gistum við í Lunigiana sem er nyrsti hluti Toskana héraðs, við rætur Appenninafjallanna. Nánar tiltekið í útjaðri miðaldabæjarins Pontremoli þar sem við njótum sveitasælu og einstakrar fjallasýnar. Stór garður með sundlaug og púttvelli umlykur hótelið og í eldhúsinu er áhersla lögð á að framreiða aðeins úr hráefni af svæðinu. Í Lunigiana er slow food hugmyndafræðin áberandi en hún varð til sem öflugt andsvar við skyndibita bylgjunni. Kjörið tækifæri gefst á meðan dvalið er í Pontremoli til að nýta hótelgarðinn eftir fjölbreytta hreyfingu hvers dags og slaka á. 

Á fimmta degi færum við okkur á malbikið – yfir til hafnarborgarinnar La Spezia þar sem við gistum þrjár síðustu næturnar á hótel Firenze e Continentale sem er mjög vel staðsett í miðbænum, rétt við brautarstöðina (sem er heppilegt ef einhverjir vilja framlengja ferðina). 

La Spezia, sem er einskonar inngangur í Cinque Terre þjóðgarðinn, er ekki stór borg en hefur blómstrað á undanförnum árum með aukinni ferðaþjónustu og komu skemmtiferðaskipa. Því má finna þar fjölbreyttar verslanir, góð veitingahús af ýmsum toga, líflegt mannlíf og skemmtilega höfn. 

Hreyfingin

Fjölbreytt hreyfing bíður okkar í þessari ferð. Í Lunigiana hjólum við á milli fallegra miðaldaþorpa og sveita, göngum upp eftir árfarvegi inn í fallegt gil þar sem við þurfum að synda á köflum, förum í fjallgöngu upp í Appenninafjöllin og göngum þar í sameiginlegum þjóðgarði tveggja héraða, Toskana og Emilia Romagna.

Ef einhver treystir sér ekki alla leið upp á topp í fjallgöngunni má hinkra miðja vegu  upp við fallegt vatn, Lago Santo og skoða sig um á meðan hópurinn fer alla leið.

Í seinni hluta ferðarinnar hjólum við í Cinque Terre þjóðgarðinum og förum í kanóa/kayaksiglingu meðfram strandlengjunni frá bænum Lerici þar sem við könnum fallegar víkur á leið okkar. 

Matarmenning

Í fyrri hluta ferðarinnar er fullt fæði innifalið þar sem við kynnumst matarhefðum Toskana héraðs og Lunigiana svæðisins en þegar komið er til La Spezia er hádegisverður og kvöldverður á eigin vegum enda er þar fjölda veitingahúsa að finna og gefst því gott tækifæri til að prófa sig áfram og gæla við bragðlaukana. 

Það er  tilhlökkunarefni að bjóða uppá aðra ferð um þetta skemmtilega svæði á mörkum Toskana og Liguria og upplifa þar í góðum félagsskap einstaka náttúrufegurð, menningu og matarhefðir.  

Þetta höfðu ferðafélagar að segja eftir seinustu ferð

„Takk fyrir frábæra ferð og fararstjórn í dásamlegu umhverfi. Mæli sannarlega með þessari skemmtilegu hreyfiferð! Veðrið var kannski ekki upp á 10 hjá okkur en það gerir minna til í góðum félagsskap og með Guðbjörgu fararstjóra sem leysir alla hnúta farsællega.” – Kristjana Sigurgeirsdóttir

„Ég er nýkomin heim úr Hreyfigleðiferð í Toskana, og er óhætt að segja að ferðin hafi bæði uppfyllt ,,hreyfingu og gleði,,. Frábærir farastjórar, gott skipulag, fjölbreytt og góð dagskrá. Ég er strax farin að skoða aðrar ferðir sem Fararsnið er með í boði fyrir næsta haust.” – Björk Guðbrandsdóttir

Tími til að bóka

Það eru aðeins 20 sæti í boði í hverri ferð og salan hefur farið vel af stað enda er þetta kjörin ferð til að njóta með maka eða vinum í skemmtilegu umhverfi. Svo er auðvitað upplagt að tryggja sér sæti núna og nýta ferðina sem hvatningu til að hreyfa sig reglulega í vetur! 

Nánari ferðadagskrá er að finna hér:
Hreyfigleði í Toskana og Cinque Terre 15.-22. júní

Hreyfigleði í Toskana og Cinque Terre 5. -12. september

 

Ert þú með hóp í huga?

Ef svo er getum við einnig skoðað í sameiningu sérferð í þessum dúr sumarið 2027 sem fellur sem best að ykkar þörfum. 

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa samband á bokanir@fararsnid.is  eða í síma 776 0875. 

Ómótstæðilegi kálfurinn 

Nú styttist í jólin með tilheyrandi veislum og velgjörðum. Þess vegna ákváðum við Fararsniðsstöllur að bregðast við áskorunum frá ferðafélögum okkar á Ítalíu og birta nokkrar uppskriftir af réttum sem slegið hafa í gegn í vínuppskeruferðunum okkar. 

Við fengum góða aðstoð frá vini okkar og meistarakokki, Friðriki V. sem er ekki síður áhugasamur en við um ítalska menningu, matargerð og hæglætis-hugmyndafræðina sem er svo ríkjandi á Ítalíu.

Fyrsta uppskriftin sem við deilum er jafnframt sú skrítnasta – Kálfakjöt með túnfisksósu – sannarlega undarleg samsetning en svo ólýsanlega góð. 

Önnuðu ekki eftirspurn

Ein skemmtileg kenning um uppruna þessa vinsæla réttar Piemonte héraðs er tengd vöruskiptum milli héraða. Liguria héraðið sem liggur við sjóinn er að sjálfsögðu þekkt fyrir sjávarfang en ekki síður fyrir pestó eða Pesto Genovese sem er upprunnið frá Genova – höfuðstað Liguria héraðs. Í pestó þarf æði mikið magn af basiliku blöðum, en pestóið frá Genova er vinsælt um alla Ítalíu og bændur á svæðinu önnuðu ekki eftirspurn eftir þessari vinsælu kryddjurt.

Bændur í Piemonte héraði ræktuðu þá basiliku sem þeir seldu til Genova og fengu ansjósur og túnfisk í skiptum. Þar sem hefð er fyrir búfjárrækt í Piemonte og minna um sjávarfang – enda héraðið við rætur Alpafjalla, bjuggu þeir til sósu úr sjávarfanginu til að bera fram með hefðbundnu kálfakjöti. 

Þessi réttur er kjörinn til að bera fram í næsta matarboði því hann þarf að útbúa deginum áður og því er engin þörf á að standa á haus rétt fyrir veisluna. Með réttinum bárum við svo fram gott Franciacorta freyðivín sem við tókum með okkur heim úr síðustu vínuppskeruferð haustsins.

Buon appetito!

Vitello Tonnato
Kálfasneiðar með túnfisksósu 

Forréttur fyrir 6 

Hráefni
Kjöt
1kg Kálfavöðvi (lærvöðvi eða hryggur) – við fengum í kjötverslun ljúffengt kjöt af u.þ.b. 8 mánaða gömlum kálfi sem hefur fengið mjólk með öðru fóðri og því er vöðvinn stærri en af mjólkurkálfi sem fær engöngu mjólk en heldur samt ljósa litnum.
100 g smjör 
2 gulrætur
2 sellerístilkar 
3 vorlaukar 
lárviðarlauf
1 anísstjarna
3 hvítlauksrif 
timiankvistur
basilkvistur 
salt og pipar 
olía til steikingar

Sósa
280-300 g af góðum túnfiski í olíu ( t.d 2 krukkur af Calippo eða öðrum sambærilegum)
2 ansjósuflök ( + nokkur auka til að skreyta með ef vill)
1 msk kapers ( + nokkur auka til skrauts)
1 hvítlauksrif 
2-3 msk jómfrúar ólífuolía
1 dl mæjónes
6 harðsoðin egg 
svartur pipar – eftir smekk
börkur og safi úr ½ sítrónu

Aðferð: 
Kjötið kryddað með salti og pipar og steikt upp úr steikingarolíu rétt til að loka kjötinu. Kjötinu komið fyrir í sous vide poka ásamt smjöri, grænmeti og kryddi og pokanum lokað. 

Eldað í sous vide 57 gráður í amk 4 klst. Látið kólna yfir nótt í pokanum. 
Einnig má elda með öðrum aðferðum – rétt eins og roast beef

Sósan 
Allt hráefni maukað saman í góðum blandara svo úr verði fallegt þykkt krem. Setjið kremið í sprautupoka. 

Skerið kálfinn þunnt t.d í áleggshníf. Þekið hvern disk með sneiðum og sprautið túnfisksósunni á miðjan diskinn og skreytið með kapers, basil og ansjósuflaki ef vill. 

Næsta vínuppskeruferð til Piemonte, Veneto og Lombardia verður 22.-29.september

Töfrar Sikileyjar

Á undanförnum árum höfum við fjölskyldan sóttt Sikiley heim í allnokkur skipti. Þar er svo margt sem heillar að eyjan kallar okkur til sín aftur og aftur. Reyndar svo mjög að íhaldssömustu jólabörnin í fjölskyldunni féllust strax á þá hugmynd að fagna þar síðastliðnum jólum sem var einstök upplifun.

Nú þegar ég er nýkomin heim frá Sikiley þar sem ég var að undirbúa Páskaferð Fararsniðs hef ég velt því fyrir mér í hverju þetta sterka aðdráttarafl liggi. Ég held að töfrarnir séu fólgnir í blöndun ólíkra menningaráhrifa og stórmerkilegri arfleifð Normanna á eyjunni.

Gullöldin

Sikiley á sér langa sögu og mörg merk menningarskeið, þó hefur valdatími Normanna sem hófst um miðja 11. öld verið kallaður gullöld Sikileyjar. Fyrir því eru áhugaverðar ástæður sem vert er að velta fyrir sér. Menning, tungumál og trúarbrögð voru og eru  að einhverju leyti evrópsk en þó ekki síður miðausturlensk, asísk eða norður afrísk.

Umburðarlyndi og virðing 

Árið 1130 varð til Konungsríkið Sikiley sameinað  hluta suður Ítalíuskaga, Möltu og norður- Afríku. Ruggero II. (Hróðgeir II.) tók við þessu sameinaða konungsveldi Normanna sem faðir hans Ruggero I (Hróðgeir I.) hafði lagt grunninn að. Strax í valdatíð Ruggero I. hófst tímabil sem kallað hefur verið gullöld Sikileyjar. 

Fyrst og fremst virðist þeim feðgum hafa borið gæfa til að virða trú og menningu hinna ólíku hópa sem þar bjuggu og ekki síður færðu þeir sér í nyt þá þekkingu sem þar var að finna. Með þátttöku Araba og Gyðinga í ríkisstjórn Ruggero II. nýttist sú þekking ríkinu til hagsbóta. 

Gyðingar voru fræðimenn sem ráku skóla og eigin hagstjórn, Arabar höfðu tækniþekkingu, þeir innleiddu áveitukerfi og  komu líka með appelsínur, sítrónur, döðlur, hrísgrjón og pistasíuhnetur og efldu þannig landbúnað ríkisins til mikilla muna.

Pólitík eða kraftaverk

Menning blómstraði og Palermo varð miðstöð þekkingar í Evrópu svo jafnaðist á við  Alexandríu, Býsans  og Bagdad á meða Evrópa bjó að öðru leiti við hinar svokölluðu „myrku miðaldir”. 

Ruggero II  lét byggja Palantína kapelluna í Normannahöllinni í Palermo. Þar blandast arabísk og býsönsk áhrif í fullkomnu samræmi og ber kapellan þessum frjálslegu viðhorfum ægifagurt vitni.

Vilhjálmur II sem var síðasti konungur Normanna lét  byggja hina fögru kirkju og klaustur í Monreale. Til er goðsögn sem segir að eitt sinn þegar Vilhjálmu hafi sofnað undir tré á „síestunni “ hafi María mey birst honum og viljað vísa  honum á falinn fjársjóð frá föður hans en að auðæfin mættu einungis nota til að byggja kirkju tileinkaða henni sjálfri. Líklegra er þó talið að kirkjan hafi verið byggð í pólitískum tilgangi því Vilhjálmur II hafi þurft að hefta vald hrokafulls erkibiskups í Palermo. Bygging kirkjunnar var gerð með miklum glæsibrag og með sama frjálslega viðhorfinu til stílblöndunar sem einkenndi stjórnarfar Normanna.

Áform hans gengu eftir með því að hann gaf Benediktusarmunkum kirkjuna og klaustrið, ábótinn  var gerður að erkibiskupi og kirkjan  að dómkirkju. Yfirburðir höfðu náðst og vald hins hrokafulla erkibiskups í Palermo dvínaði. Kirkjan var vígð árið 1189 en það sama ár lést Vilhjálmur II aðeins 36 ára gamall.  Hann lét ekki eftir sig erfingja og þar með lauk  valdatíð Normanna á Sikiley. 

Meistarar í svo mörgu

Blönduð menning og geta til að samræma ólík áhrif  hefur verið kjarninn í sjálfsmynd eyjaskeggja. Þessa eiginleika hefur gætt æ síðan í sikileysku samfélagi og kemur fram í miklum fjölbreytileika í mannlífi, matargerð og byggingarlist eins og víða má sjá í einstökum verkum Barokk bygginga sem skera sig úr fyrir frjálslega og frumlega hönnun ekki síst í borginni Noto sem við munum heimsækja um Páskana en hún var endurbyggð á 17. öld eftir mikla jarðskjálfta.

Það er svo sannarlega tilhlökkunarefni að eiga í vændum ferðalag til Sikileyjar um páskana.

Með kveðju, 

Guðbjörg 


Hér má sjá ferðalýsingu: Páskar á Sikiley 16.-25.apríl 2025

Drottning freyðivína á Ítalíu

Sumarið fór ánægjulega vel af stað hjá Fararsniði. Í byrjun júní þræddum við vínekrur, stíga og borgir í Sælkeragöngu í Toskana með frábærum hópi ferðalanga. Þaðan færðum við okkur svo norður eftir í Sælkeragöngu við Garda þar sem veðrið lék heldur betur við okkur. 

Það er ekki bara á Íslandi sem fólki verður tíðrætt um veðrið. Á Ítalíu snýst umræðan oftar um áhrifin á uppskeruna því mikið er undir veðrinu komið. Þessa dagana er spennan í hámarki því eftir óvenju mikil hlýindi íupphafi vors kom vætusamt og svalt tímabil. Þetta samspil fór illa í margar plöntur t.d kirsuberjatré og önnur ávaxtatré sem blómstra snemma. Ólífutrén blómstruðu þó við þessi skilyrði sem aldrei fyrr og vínviðurinn fer vel af stað víðast hvar. Nú er hins vegar að bíða og sjá hvað sumarið ber í skauti sér. 

Í haust munum við halda í tvær Vínuppskeruferðir til norður Ítalíu og skoða afraksturinn með eigin augum. Í þessum ferðum um Veneto héraðið þar sem við kynnumst Valpolicella og Soave vínsvæðunum og Barolo í Piemonte héraðinu bjóðum við upp á nýjung í ár – en það er kynning á drottningu freyðivína á Ítalíu – Franciacorta vínum í Langbarðalandi (Lombardia). 

Franciacorta

Flestir þekkja ítölsku Prosecco vínin og margir telja nafnið samheiti fyrir ítölsk freyðivín en svo er  alls ekki. Fyrir þá sem ekki vita er Prosecco  ákveðin tegund af freyðivíni sem er framleidd á afmörkuðu svæði í Veneto héraðinu. Franciacorta er hinsvegar lítið vínrækarsvæði í nágrenni borgarinnar Brescia í Lombardia og þrúgurnar að mestu leyti þær sömu og í Kampavíni. 

Ekki magnið heldur gæðin

Framleiðsluferli Franciacorta vína er líkara kampavíni – sannkallað handverksferli þar sem galdurinn gerist í flöskunni sjálfri en ekki í stáltönkum eins og við framleiðslu  Prosecco og annara  fjöldaframleiddra  freyðivína. Þessi aðferð er mun dýrari, lengri og vandasamari en skilar sér í bragðmeira og fágaðra víni með fíngerðari „bubblum”.

Glas ekki sama og glas

Til þessa að njóta herlegheitanna sem best þarf helst að bera vínið fram í þar til gerðum glösum, háum með túlípana-lagi sem þrengjast að ofanverðu til að tryggja að gosið haldist sem lengst í víninu. 

Næsta haust bjóðum við upp á Vínuppskeruferð dagana 22.-29. september og nánari ferðadagskrá má nálgast hér

Töfrar Grikklands

Í september ætlum við í sælkeraferð til Grikklands í fyrsta skipti í sögu Fararsniðs. Til landsins þar sem fortíð og nútíð mætast átakalaust og heillandi. Flogið verður beint til Aþenu og dvalið í 8 nætur á tveimur stöðum, í Nafplio og Aþenu. Þar kynnumst við menningunni undir dyggri leiðsögn Dominik Brun, leiðsögu- og heimamanns og íslensks fararstjóra. Við munum líka njóta alls þess besta sem grísk matargerð hefur uppá að bjóða.

Gist á mjög góðum hótelum

Fyrstu dagana munum við dvelja í bænum Nafplio þar sem við gistum á góðu fjölskyldureknu hóteli. Hótel Agamemnon er mjög vel staðsett við ströndina í þessum einstaka bæ sem margir telja einn þann rómantískasta í Grikklandi. Ljúft er að rölta um, njóta mannlífs og menningar í þessum fallega hafnarbæ.

Í seinni hluta ferðarinnar dveljum við á Hótel International, mjög góðu og vel staðsettu hóteli  í miðborg Aþenu. Stutt er í alla þjónustu, markað og aðeins er hálftíma ganga að Acropolishæðinni frá hótelinu. 

Skoðunarferðir

Af fjölmörgum viðkomustöðum okkar í þessari Sælkeraferð má nefna fornminjarnar í Epidauros, Asclepios heilsuböðin, Corinth skipaskurðinn serm er bæði sá dýpsti í heimi og ákaflega tilkomumikill að ógleymdri sjálfri Acropolishæðinni í Aþenu. VIð munum eiga rólegan dag á eyjunni Hydra. Þar munum við ganga um eyjuna enda eru bílar og mótorhjól  bönnuð með lögum.

Næði til að njóta á frídögum

Í þessari ferð eru tveir frjálsir dagar til að gera það sem hugurinn girnist. Við fáum frídag í Nafplio sem hægt væri að nýta til að rölta um, slaka á í bænum eða fara á ströndina. Tímann má ennfremur nota til að skoða Palamidi kastalann sem stendur í hlíðunum fyrir ofan bæinn og  var reistur af Feyneyingum á mettíma um 1713,  en hann gegndi mikilvægu hlutverki í grísku uppreisninni.

Annar frídagur gefst svo í Aþenu í lok ferðar en þar þarf engum að leiðast enda einstaklega lífleg borg.

Að lifa til að borða eða …

Ómissandi í Sælkeraferðum Fararsniðs eru heimsóknir til vínbænda og þessi ferð er engin undantekning frá þeirri reglu. Við fáum leiðsögn um vínakrana, kynnumst framleiðsluferlinu og fáum að smakka afurðirnar. Einnig heimsækjum við ólífubónda og framleiðanda  lífræns balsamikediks og  fáum að gæðum okkur á lokaafurðum þeirra. Margir þekkja grísku útgáfuna af „brennivíni” Ouzo og Tsipouro sem svipar til Grappa á Ítalíu en við fáum einnig innsýn í framleiðsluna á því. Þegar til Aþenu er komið fáum við leiðsögn um líflegan matarmarkað þar sem heimamenn versla og ferskmetið fyllir borðin.

Tími til að bóka

Nokkur sæti eru laus í þessa einstöku ferð þar sem við dekrum við öll skilningarvitin.

Nánari ferðadagskrá er að finna hér:
Sælkeraferð til Grikklands 2.-10.september

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


Hvaða pizza er best ?

Það er stóra spurningin nú þegar alþjóðlegi pizzadagurinn er genginn um garð! Er það þessi ítalska þunnbotna eða ameríska þykkbotna?
Eitt er þó víst, pizzan kemur upphaflega frá Ítalíu, nánar tiltekið frá Napólí. Það er að segja í þeirri mynd sem við þekkjum í dag. Reyndar má rekja flatbrauð með áleggi til Egyptalands, Grikklands og Rómverja allt aftur til 6.aldar f.kr. 
Napólí-pizzan leit dagsins ljós á Ítalíu í byrjun 19. aldar og sló strax í gegn enda einföld og ódýr fæða sem fjölmenn verkamannastéttin kunni að meta. 

Pizza margaríta

Í heimsókn Umberto I, konungs Ítalíu og Margheritu drottningar til Napólí árið 1889 var þeim að sjálfsögðu boðið upp á pizzu sem var kölluð Pizza Mozzarella. Á henni mátti finna tómata, mozzarella ost og basiliku – enda vel við hæfi að nota ítölsku fánalitina- rauðan, grænan og hvítan. Drottningunni líkaði pizzan svo vel að Napólíbúar endurnefndu hana Pizza Margherita, drottningunni til heiðurs. Þessi pizza er okkur vel kunn í dag undir því nafni. 

Veðurumræðan

Við Íslendingar þreytumst seint á að tala um veðrið, það virðist endalaus uppspretta umræðna jafnt meðal kunnugra og ókunnugra. Svipaða sögu má segja um pizzuna á Ítalíu þar sem allir hafa skoðun á henni. Má setja ananas á pizzu eða ekki? Forseti Íslands hefur t.d tekið þátt í þeirri umræðu. Hann er alfarið á móti ananas og Ítalir eru honum almennt sammála. En hvað með ansjósur?

En áleggið er ekki eina ágreiningsefnið, hvorar eru betri, Napólí- eða Rómar pizzur? Fyrir þá sem ekki vita þá eru Napólí pizzur eldaðar við mjög háan hita í stuttan tíma en þá verða kantarnir háir og mjúkir. Rómverskar pizzur eru hinsvegar eldaðar við lægri hita í lengri tíma og verða kantarnir þynnri og pizzan öll stökkari. 

Í ferðum okkar til Ítalíu gefst nægur frítími til að kanna leyndardóma pizzunnar. Í því felst t.d. tækifæri fyrir aðdáendur til að gera samanburðarrannsókn á fyrirbærinu. Skoðaðu ferðaúrvalið hér

Sælkeraganga og rétturinn sem sló í gegn

Daginn er farið að lengja og hugur okkar farinn að reika til Ítalíu. Sælkeralandsins þar sem einstök virðing er borin fyrir hráefninu og alúð er lögð í matargerðina. Það þarf nefnilega ekki að vera flókið að töfra fram dýrindis rétti ef hráefnið er ferskt og gott – einfaldleikinn er að endingu bestur. 

Eggaldin að hætti Parmabúa

Melanzane alla Parmigiana eða eggaldin að hætti parmabúa er vinsæll en einfaldur réttur sem sló heldur betur í gegn í Sælkeragöngum Fararsniðs síðastliðið sumar. Svo mjög, að hörðustu kjötætur reyndu að múta matreiðslumeistaranum til að ljóstra uppskriftinni upp, án árangurs. 

Við stöllur gerðum tilraun til að leika þetta eftir í eldhúsinu heima. Það lukkaðist dásamlega og við deilum uppskriftinni hér að neðan fyrir áhugasama.

Allskonar upplifun

Hreyfingar og stefnur eins og slow-food, slow-travel/hægferðir og cittá-slow/hæglætisbær (stefna sem Djúpivogur tók t.d upp) eru sem betur fer orðnar fyrirferðameiri í umræðunni. Þær miða allar m.a. að því að hægja á sér, bera virðingu fyrir náttúrunni og umhverfinu, upplifa og njóta- en ekki þjóta. 

Slow food samtökin voru stofnuð á Ítalíu árið 1986 í kjölfar mikilla mótmæla vegna opnunar skyndibitastaðar rétt við Spænsku þrepin í Róm.  Tilgangurinn var meðal annars að efla meðvitund neytenda fyrir góðu, hreinu hráefni, framleiddu með sjálfbærum hætti þannig að það sé sanngjarnt fyrir bæði framleiðendur og neytendur og nota hreinar afurðir úr héraði. Sem dæmi bjóða veitingastaðir í anda slow food á Ítalíu upp á staðbundna rétti en sú nálgun gerir það að verkum að hvert svæði býður með stolti upp á svæðisbundna rétti og því er fjölbreytnin mikil milli landshluta. 

 Á Ítalíu er þessi nálgun ekki bara hugmynd á pappír – eða fyrir einhverja sérvitringa,  heldur er eins og að hún sé í blóði þjóðarinnar. Þorri ítölsku þjóðarinnar myndi ekki kaupa jarðaber utan uppskerutíma á þeirra svæði né ólífuolíu sem merkt væri „ólífur frá Evrópusambandslöndum” heldur leitast fólk við að kaupa vörur og hráefni frá framleiðendum úr nærumhverfinu. 

Þetta er stefna sem Fararsnið hefur haft að leiðarljósi í skipulagningu ferða sinna. Að fá holla hreyfingu í fallegu umhverfi, borða staðbundinn mat á völdum stöðum og njóta hans í skemmtilegum félagsskap. En eins og sagt er á Ítalíu – það eldist enginn við matarborðið. 

Melanzane alla Parmigiana:

Innihald: 
3 stór eggaldin 
Olífuolía
1 laukur
1 hvítlauksgeiri
1,5 tsk þurrkað oregano
2 dósir/eða flöskur góðir niðursoðnir tómatar ( 800g í heildina)
30g basilika (má sleppa) 
3 lúkur rifinn parmesan ostur 
2 lúkur brauðraspur
2 kúlur af Burrata osti (eða mozzarella)

Aðferð:

  1. Skerið eggaldinið í 1cm þykkar sneiðar, penslið með ólífuolíu og grillið þar til það mýkist á grillpönnu/air-fryer/ofni eða grilli-kælið sneiðarnar á bakka.
  2. Ofninn hitaður í 190 gráður ( undir og yfirhiti).
  3. Skerið lauk og hvítlauk smátt og steikið létt í potti ásamt þurrkuðu oreganói. Bætið tómötum útí og sjóðið í ca 15 mínútur eða þar til sósan þykknar. Kryddið með salti og pipar eftir smekk og bætið basiliku út í ef þið eigið hana til (hægt er að mauka sósuna með töfrasprota eða í blandara).
  4. Þá hefst samsetningin í eldfast mót: Setjið lag af tómatsósu í botninn og þekið með eggaldinsneiðum ( eins og lasagna). Dreifið smá parmesan osti og rífið burrata ost yfir með fingrunum.. Endurtakið svo 1-2 önnur lög með sama hætti ( fer eftir stærð fatsins sem þið notið). Við endum svo á lagi af tómatsósu, burrata osti, parmesan og brauðraspi.
  5. Bakið í ca 30 mínútur við 190 gráður – eða þar til yfirborðið er orðið gullið og aðeins stökkt. Buon appetito 

Afturganga í óveðri

Gardavatnið þarf vart að kynna fyrir íslenskum ferðalöngum en einn af fjölmörgum undurfögrum bæjum sem raða sér meðfram vatninu er Sirmione. Bærinn stendur  á tanga sem skagar langt út í þetta stærsta stöðuvatn Ítalíu. Sirmione er einn af viðkomustöðum okkar í Sælkeragöngu við Garda enda einstakur staður vegna sögu, menningar og náttúrufegurðar. 

Scaligero kastalinn

Í Sirmione er að finna einn best varðveitta kastala á Ítalíu en hann var byggður á 13.og 14. öld  af Scala fjölskyldunni. Nafnið hljómar eflaust kunnuglega í eyrum margra vegna óperuhússins fræga í Mílanó sem nefnt er eftir fjölskyldunni en hún var valdamikil á norð-austur Ítalíu. Kastalinn hefur þjónað mörgum hlutverkum í gegnum tíðina og var á tímabili nýttur sem fangelsi þegar Frakkar og Austurríkismenn réðu ríkjum á norður Ítalíu. Þessi mikilfenglegi kastali er á lista yfir vinsælustu viðkomustaði á Ítalíu og gefst hverjum og einum tími til að skoða safnið sem þar er, í frítímanum.

Afturgangan í óveðrinu

Sagan segir, að í kastalanum hafi búið ung hjón, hin ægifagra Arice og eiginmaður hennar hann Ebengardo. Í miklu óveðri sem gekk yfir Gardavatnið óskaði feneyskur riddari, Elaberto að nafni, eftir næturskjóli hjá ungu hjónunum sem reyndist auðsótt. Riddarinn gat hinsvegar ekki látið sér nægja að horfa á hinu fögru Arice heldur gerði hann tilraun til að ræna henni. Hún öskraði og varðist  hetjulega en með þeim afleiðingum að Elaberto stakk hana til bana. Eiginmaðurinn varð var við lætin, kom inn og sá  konu sína liggjandi á blóði sínu . Í örvæntingu sinni réðst hann á riddarann sem beið bana í átökunum.
Ebengardo lifði ekki lengi eftir þetta og dó úr sorg. Enn þann dag í dag þegar veður er vont má sjá hann ráfa um kastalann í leit að sinni heittelskuðu Arice.

Rómverskur lúxus

Á 1.öld f.kr hófu Rómverjar að byggja glæsileg 3ja hæða lúxushíbýli yst á tanganum sem Sirmione bærinn stendur á og kallast Grotte di Catullo. Í dag er þetta einn merkasti fornleifauppgröftur Ítalíu og einstakt dæmi um glæsibyggingar rómverja frá þessum tíma.

Upp úr jörðinni í Sirmione streymir steinefnaríkt vatn sem talið er heilsubætandi. Líklegt er að Rómverjar hafi vitað af heilsubætandi eiginleikum þess þegar á fyrstu öld. Á 20. öldinni hófu menn að nýta þessar heilsulindir á markvissan hátt með því að bjóða fólki upp á heilsumeðferðir.

Sælkeragöngur við Garda

Fararsnið býður upp á tvær Sælkeragöngur við Garda næsta sumar og þar munum við meðal annars þræða götur og upplifa stemninguna í þessum einstaka bæ sem Sirmione er.

Sælkeraganga við Garda 11.-18.júní 2024

Sælkeraganga við Garda 18.-25.júní 2024

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


Töfrandi Toskana

Fararsnið hefur á undanförnum árum boðið upp á Sælkeragöngur í Toskana á Ítaliu enda er þar að finna einstaka náttúrufegurð, matar- og vínmenningu. Byggingarlistin  og myndlistin á sér enga hliðstæðu enda má segja að fæðingarstaður endurreisnainnar sé í Toskana héraði. 

Við höfum ákveðið að bjóða tvær ferðir til Toskana á næsta ári, í júní og í ágúst. Uppselt var í fyrri ferðina en við gátum bætt við nokkrum sætum og því eru 2 herbergi laus í þá ferð. Í þessum ferðum einbeitum við okkur að því að njóta þeirra listisemda sem þetta sögufræga hérað hefur að bjóða.

Gist á glæsilegu hóteli

Gist verður í bænum Montecatini Terme á Grand Hótel Vittoria sem er glæsilegt hótel í Liberty stíl. Hótelið stendur ofarlega í bænum en er þó í þægilegu göngufæri frá miðbænum. Veitingahús eru fjölmörg og bjóða uppá  úrval kræsinga. Við hótelið er sundlaug og fallegur garður þar sem hægt er að njóta hvíldar. Hótelið býður líka upp á heilsumeðferðir þar sem fá má allskyns dekur sé þess óskað.

Gangan í bæinn tekur um 7 mínútur og gaman að ganga niður breiðgötuna sem liggur frá hótelinu og var á gullaldarárum Montecatini Terme glæsileg heimreið að þessu fína hóteli.

Menningarferðir til Lucca, Flórens og Vinci

Ferðin til Lucca er fyrsti viðkomustaður okkar en Lucca var valdamikið borg-ríki og ein af mikilvægustu borgum Ítalíu á miðöldum. Hringlaga  borgarmúr umlykur þessa fallegu borg sem á sér merka sögu og var Leonardo da Vinci einn af nokkrum sem komu að hönnun múrsins. Við fáum innsýn inn í sögu og menningu borgarinnar með innlendri staðarleiðsögn sem enginn verður svikinn af. Puccini var fæddur og alinn upp í Lucca og var hann alla tíð mjög stoltur af heimahögunum. Eftir góða fræðslu fáum við rúman tíma til að kíkja í verslanir, fá okkur hressingu í iðandi mannlífinu, ganga um, njóta, eða leigja hjól og hjóla uppi á borgarmúrnum sem er bæði aðgengileg og skemmtileg upplifun.

Næsta borg sem við heimsækjum er Flórens með allar sínar glæstu byggingar og torg sem mörg hver eru prýdd meistaraverkum aldanna, ekki síst endurreisnartímans. Byggingar og höggmyndir eftir Michelangelo, Brunelleschi, Ghiberti, Donatello og fjölmarga aðra mikla meistara má sjá hvert sem litið er. Við göngum yfir Gömlu brúna „Ponte Vecchio” frægustu brú Ítalíu og jafnvel Evrópu. Heimildir um brúna má rekja allt til ársins 966 en hún var endurbyggð á 14. öld í núverandi mynd. Áður var á brúnni miðstöð kjöt-og fiskverslunar en er nú miðstöð skartgripasölu. Brúin á sér langa og merka sögu sem gaman er að fá innsýn í á göngu okkar með leiðsögn um borgina. Við fáum auðvitað líka frjálsan tíma í Flórens og getum valið okkur viðfangsefni að vild.

Gönguferð um æskuslóðir Leonardo da Vinci er á dagsránni hjá okkur en þann dag munum við ganga um hæðir og vínekrur, landslag sem veitti meistara Vinci mikinn innblástur. Meðal áningastaða verður æskuheimili Leonardos og bærinn Vinci sem hann var kenndur við. Einnig munum við heimsækja vínbónda á leið okkar, smakka á framleiðslunni og fá hádegishressingu.

Óhætt er að segja að heimsókn á heimaslóðir þessa einstaka listamanns og það að kynnast betur uppruna hans og æviskeiði sé nærandi fyrir andann.

Næði til að njóta á frídegi

Í ferðum Fararsniðs er jafnan reynt að tryggja frjálsan tíma til að njóta staðar og stundar að vild.

Hægt er að að fara til Viareggio skoða þennan fallega strandbæ hvort heldur sem er til að hvíla sig á ströndinni eða njóta byggingalistar og mannlífsins. Einfalt er að snúa aftur til Lucca eða Flórens til að kanna þær borgir betur, ganga um Montecatini Terme og skoða þennan sögufræga heilsubæ sem á sínum tíma var mjög mikilvægur áningastaður betri borgara en þeir flykktust þangað til að bæta heilsuna í félagsskap annarra mektarmanna, sýna sig og sjá aðra.

Í bænum er einnig fjöldi matsölustaða sem gaman er að heimsækja.

Matarupplifun

Ítalía öll er mikil matarkista og þykir okkur hjá Fararsniði gaman að bjóða upp á góðan mat og vín í ferðum okkar.

Flestar máltíðir sem innifaldar eru í dagskránni eru margrétta máltíðir með víni og er hver og einn staður valinn með tilliti til einstakrar upplifunar fyrir bragðlauka og önnur skilningavit.

Tími til að bóka

Örfá sæti eru laus sæti í ferðina okkar í ágúst. Það er því ráð að hugsa hratt og tryggja sér pláss í þessar vinsælu ferðir sem bjóða upp á einstaka upplifun í Toskana. 

Nánari ferðadagskrá er að finna hér:
Sælkeraganga í Toskana 2.-9.júní 2024 – UPPSELT
Sælkeraganga í Toskana 20.-27.ágúst 2024  – ÖRFÁ SÆTI LAUS

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


Sæludagar við Garda

Töfrandi blanda fegurðar, menningar og afþreyingar

Gardavatnið, stærsta vatn Ítalíu sem teygir sig upp í Alpana hefur löngum verið vinsæll áfangastaður enda býður það upp á svo ótal margt sem heillar ferðaglaða. Sælkeraganga við Garda hefur verið hluti af ferðaframboði Fararsniðs um langt skeið og verið vinsæl bæði meðal vinahópa og einstaklinga. Færri komust að en vildu í ár og því verða 2 ferðir í boði í júní 2024. 

Gisting á einstökum útsýnisstað 

Hótel Poiano sem gist er á er staðsett upp í hlíðunum fyrir ofan bæinn Garda og er aðstaðan þar öll til fyrirmyndar. Veitingaaðstaða er góð á hótelinu og hægt að njóta hennar úti og inni í einstöku umhverfi. Grænt svæði umlykur hótelið og skartar það 50m langri sundlaug með sundlaugarbar, sólbekkjum og útsýni yfir Gardavatn. Hreyfiglaðir geta tekið þátt í sundleikfimi sem þar er boðið upp á. Mjög góð Spa- og líkamsræktaraðstaða er á staðnum ásamt púttvelli og ýmsum öðrum afþreyingarmöguleikum innan hótelgarðsins. Margir njóta þess að eyða frítíma ferðarinnar í garðinum, slaka á og eiga notalegar stundir með ferðafélögunum. 

Hótelið er í 25 mín göngufæri frá miðbænum í Garda en hótelið býður líka upp á reglulegar ferðir yfir daginn og einfalt er að taka leigubíl kjósi menn það. 

Næring fyrir líkama og sál

Sælkeraganga eins og nafnið felur í sér er sambland af léttum göngum og sælkeramáltíðum. Á fyrsta degi förum við í siglingu til Sirmione sem staðsett er á sérkennilega löngum tanga sem skagar út í Gardavatnið. Eftir göngu um bæinn fáum við frjálsan tíma til að næra okkur og njóta líflegs mannlífsins áður en heim er haldið. 

Göngurnar eru mis-langar og erfiðar, t.d. göngum við einn daginn frá hótelinu, meðfram strandlengjunni, að bænum Bardolino sem er einn af fjölmörgum póstkortabæjum við vatnið. Á leiðinni má sjá heimamenn dorga, kát börn með fullar fötur af nýveiddum smáfiski, ferðamenn að njóta umhverfisins með ítalskan- gelato ís eða litríkt Spritz í glasi. Þessi ganga endar svo með glæsilegum kvöldverði á fjölskyldureknum veitingastað. 

Seinasta gangan verður á La Rocca – höfðann sem gnæfir yfir bænum Garda en sú ganga er nokkuð á fótinn. Okkur verður þó ríkulega launað, bæði af fegurðinni sem blasir við þegar horft er yfir vatnið og með hádegisverðinum sem hún Elena býður okkur upp á í garðinum hjá sér áður en við höldum áfram síðasta spölinn heim á hótel.

Menningin og sagan 

Menning og saga lætur engan ósnortinn í dagsferð okkar til Verona. Þann dag skoðum við þessa einstöku borg, byggingarlist aldanna þar sem áin Adige hlykkjast um. Við þræðum helstu götur og torg og njótum mannlífsins. Frjáls tími í borginni áður en okkur verður vísað til sætis á glæsilegum veitingastað sem staðsettur er í sögufrægri höll í hjarta Verona. Hápunkti dagsins verður svo náð þegar við fáum að upplifa óperuuppfærslu í sjálfri Arenunni, hinu best varðveitta hringleikahúsi frá tímum rómverja (meira um Arenuna hér) 

Næði til að njóta

Af nægu er að taka á frídegi ferðarinnar eða þegar frí gefst hluta úr degi. Auðvelt er að fara með hótelbílnum til Garda og njóta mannlífsins þar, taka ferju til næstu bæja, leigja hjól, njóta aðstöðunnar á hótelinu eða taka kláf upp á Monte Baldo frá bænum Malcesine svo fátt eitt sé nefnt. 

Fjölda góðra veitingastaða er að finna á svæðinu þar sem boðið er upp á mat úr héraði og vinalega þjónustu. 

Nánari ferðadagskrá er að finna hér:
Sælkeraganga við Garda 11.-18.júní 2024
Sælkeraganga við Garda 18.-25.júní 2024  

Ef einhverjar spurningar vakna eða vinahópurinn/saumaklúbburinn er að velta fyrir sér að bóka ferð saman er hægt að hafa sambandi á bokanir@fararsnid.is eða í síma 611 8811. 

Ferðakveðja,

Ásta og Guðbjörg


Schladming, eitt af betri Skíðasvæðum Austurríkis

Schladming sem er í einungis 1 klst. akstursfjarlægð frá flugvelli er einstaklega snjó-öruggt svæði. Það er m.a ástæðan fyrir því að Schladming svæðið er eitt af  þeim svæðum sem FIS skíðasambandið hefur valið fyrir heimsbikarkeppnina en hún hefur hann verið haldin þar í janúarmánuði síðan 1973. 

Svæðið samanstendur af fjórum svæðum sem öll eru vel tengd og auðvelt að skíða á milli þeirra allra. Strætó gengur einnig á milli svæða, kjósi menn það heldur. 

Eitthvað fyrir alla


Allir geta fundið brekkur við hæfi og skartar Schladming fjölda brekka í öllum erfiðleikastigum, bláum, rauðum og svörtum. Brekkurnar eru einnig opnar 3 kvöld í viku og er það einstök upplifun að bruna niður ný-troðnar og flóðlýstar brekkurnar.

Hótelið sem varð fyrir valinu er eitt af betri hótelum Schladming, mjög gott 4stjörnu Ski-in-out hótel, brekkurnar beint fyrir utan gluggann og skíðageymslan upphituð. Öll aðstaða er til fyrirmyndar en hótelið var gert upp í Covid, upphituð útisundlaug, panorana-gufubað með útsýni yfir skíðasvæðið ásamt öðrum gufuböðum, einstöku hvíldarherbergi svo fátt eitt sé nefnt. Góður matur er á hótelinu og ýmislegt skemmtilegt við að vera eins og gömul keilubraut sem vekur jafnan mikla lukku. 

Schladming er þó ekki bara hvítar brekkur, heldur sjarmerandi lítill  bær með góðum kaffi- og veitingahúsum, verslunum og flestu því sem hugurinn girnist í skíðaferð.  Þú finnur austurrískan klæðnað „dirndl“ og „lederhosen“ ásamt tískufötum og einskaklega miklu úrvali af skíðafatnaði.

Après-ski stemning

Fyrir þá sem kunna að meta hressingu eða „après-ski” í skemmtilegum félagsskap eftir góðan skíðadag er úrvalið mikið og stemningin einstök. Skemmtilegir barir eru á hverju horni og endastöðvum s.s Hohenhaus Tenne, AlmArenA, Hochalm & Fassi-Bar og svo mætti lengi telja, ásamt heimabarnum við hótelið.


„Eftir að hafa dvalið á þessu hóteli í 11 daga s.l. vetur og skíðað á Schladming svæðinu er hægt að mæla með þessari ferð. Frábært hótel og frábært skíðasvæði því þetta eru fjögur svæði sem öll eru vel tengd.“ Ingólfur Bruun,2023

Skoða ferð

Blóðbað eða tónlist?

Fyrir nokkrum árum gerðum við hjónin okkur ferð í Arenuna í Verona, þetta risastóra hringleikahús sem Rómverjar byggðu á fyrstu öld e.kr. og stendur þarna enn. Þegar Arenan var byggð stóð hún utan borgarmarkanna þar sem hún hlýtur að hafa blasað við úr öllum áttum og dregið til sín skemmtanaglaða íbúa úr nærliggjandi byggðum. Svo skínandi fögur, gerð úr rauðleitum kalksteini frá Valpolicella sem greinilega er endingargott byggingarefni.Það var mikil upplifun að ganga inn í þetta forna mannvirki. Óhjákvæmilega verður manni hugsað til þess fjölda sem þangað hefur sótt skemmtanir eða spennu síðustu tuttugu aldirnar.


Sem betur fer hafa viðhorf manna til skemmtana þó breyst með tímanum. Rómvejar skemmtu sér við að horfa á skilmingarþræla og villt dýr berjast fyrir lífi sínu og fengu jafnvel að hafa áhrif á það hvort lífum þeirra skyldi þyrmt eða ekki. Ljón, tígrisdýr, krókódílar, nashyrningr og margar aðrar dýrategundir voru sóttar til Afríku og Asíu og birnir til Skotlands til þess að eins að enda líf sitt í Arenunni mönnum til skemmtunar. Skilmingaþrælar börðust ýmist hver við annan eða við dýr og dýrum var att saman. Andrúmsloftið hlýtur að hafa verið hlaðið spennu og blóðlyktin legið í loftinu.

Tónlistin tekin við


Á síðari öldum sóttu menn þangað kappleiki og mót af geðfelldara tagi en í seinni tíð hefur tónlistin verið allsráðandi. Margir frægir tónlistamenn hafa haldið tónleika í Arenunni eða komið þar fram í óperum m.a. nokkrir landar t.d. Kristján Jóhannsson, Kristinn Sigmundsson og Björk. Um 1913 varð Arenan vettvangur fyrstu raunverulegu utanhúss-óperunnar í heimi og enn er hún talin ein sú mikilvægasta.

Að skynja söguna


En nú vorum við hjónin þarna komin til að njóta tónlistar á heimsmælikvarða. Sætin okkar voru í miðjum hringnum (arenunni) þar sem bardagarnir fóru fram forðum. Það átti að flytja óperuna Carmen eftir Georges Bizet með úrvals tónlistarfóki og glæsilegri sviðsetningu.

Fjöldi fólks var þarna bæði innlent og erlent, sumir á stuttbuxum og strigaskóm og aðrir  í sínu fínasta pússi. Spenna var í loftinu og hátíðarstemning, allir komnir til að  upplifa eitthvað alveg sérstakt, njóta óperusýningari í þessu einstaka forna mannvirki og það í hlýju kvöldloftinu undir stjörnubjörtum himni, myrkur skollið á og sviðið eitt  upplýst. Ég get því sannarlega mælt með því fyrir alla, óháð tónlistaráhuga að upplifla viðburð í Arenunni. 

Höfundur: Ólöf Oddgeirsdóttir

Við sjáum óperuuppfærslu í Arenunni í þessum ferðum:

Sælkeraganga við Garda 11.- 18.júní 2024

Sælkeraganga við Garda 18.-25. júní 2024